Rom 5 | GbrGAW | STEP | Ntu lonu, nsayi ye shi aku yi ze abefyecezhin yi n Shekwoyi abye nyi, ntu yi gaiciya ga ɓo n wo alkawali. Yi ɓa bwa bugba fu hin-hin nsaiyi ntu n ɓo n Yesu Kristi eyi Dagayi ku zhin ga yi nyi.

Romans 5

Bugbafu N Shekwoyi Yi

1 Ntu lonu, nsayi ye shi aku yi ze abefyecezhin yi n Shekwoyi abye nyi, ntu yi gaiciya ga ɓo n wo alkawali. Yi ɓa bwa bugba fu hin-hin nsaiyi ntu n ɓo n Yesu Kristi eyi Dagayi ku zhin ga yi nyi. 2 Ntuge, ntu n yi gaiciya ga ɓo nu n wa ɓe n yi n aba n yi gni-agni zhin n saiye nyi. Yi n bugba kalayi n agmadayi, yi shiwye ya ze enya n Shekwoyi n ceyi dna n bugba ntu yi ɓo ya ze.

3 Yi ɓa dagma ce sanu n ya lo wahala ncei, ntu ge yi kpe ge ko n na pmayi lo-lo n yi aba, ɓa wu yi shi yi ɓa zhin hankuri. 4 Hankuri zhin kwa ɓe n kala yi kwa bma yi zhin ya kpema Shekwoyi esayi vinya, ya zhin apma n kwoi har esa n yi awyetu n gaiciya gai ɓa bwa kala n mi gni yi. 5 Nnavun, sanu n kwo zhin lonu, yiɓa mi ya bwa bugba kala ko knidonu na zhin yiʼa, yi kpe ge nyaho ta zhin ntuge yi kpelo shi Shekwoyi yeyi, yi wo ye-ye yi lo n yi abugba mi, ntuge Shekwoyi zafun dnalo n yi mi, woi nuyi a bugba n wo yeye yi.

6 Sanu n yi to ɓei n bmazhin yi, n tna gni-gni zokwo, Yesu wa ɓedna n sai dai-dai wafi ntu n yi alaifi ɓo, eyi n yi to ɓei n na pmayin. 7 Ko yi n na pmayi, yi to ɓei dnace nge ozaho ɓa fi n yi ɓon, ko shiko nyi kpekni ko ɓei ɓa yezhin lonu. 8 Ama, Shekwoyi wa wuyi owo yeye shiwa tnu n Kristi yi, wa fi tu n yi ɓo, tunyi yi ye zhin a laifi da. 9 Shi kwo nyi nwo ami yi nu, nwa zhin aɓedeye gayi, yi ye zhin alaifi da, ai, woɓa gna zhin-zhin gayi nu n sayi, shi wo layi gni nyi. Nsayi wo ɓa gni yi n Shekwoyi minagyi vinya n kwo ɓelo nyi. 10 Tunyi, yi ye zhin wo anuɓayi, a jeze ɓe n yi n Shekwoyi aba, ntu n wo Nugun efi ɓo. Anabarka yakwo nu, n yi ɓa gna bwa n sayi n yi ku zhin wo anugundo nyi, woi dna lo n yi mi.

11 Nsayi ye, yi dagma ntu jedoɓe woi-woi ɓo n Shekwoyi, ntu nya ɓo n yi Dagayi Yesu Kristi wa zhin gayi, nwa fi ntu yi alaifi ɓo nyi, woi zeyi Shekwoyi a nugundo.

Kristi Wu Lo Gbo N Adamu Yi

12 Sanu Adamu ɓei zhin laifi, ɓenukwoyi zhin a lo anyi vinya. Owo laifi kwoi gna efi laɓa n na anyi vinya, ntucenu anya vinya ɓai kwo, ɓai fi, ntuge aza vinya n ku laifi zhin. 13 Yi kpelo ge Adamu laifi nu na ɓe nɓe deye yi, ntuge kodayake, aza ɓei zhin ɓai zhin Benukwoyi tun Adamu sa, har Musasa, Shekwoyi to ɓei zhin woi daɓa ofi wa ntuge ɓa bma wo a wyidna yan, gama woto ɓei gaɓa owo awyidnan, kwo wo gna ɓa enya n wo ye ɓa zhin.

14 Ntu lonu sanu n ɓa nayi ɓei zhin kwoi fi, kwo to ɓei fi ntu n ɓa laifi ɓo nun, ntuge, ɓa to ɓei zun Shekwoyi owa gna, shi Adamu ɓei zhin nyi m. Dogbe lo n Adamu a tasin n Kristi yi n wo to ɓei lu ɓe nyin.

15 Doshan lo dna oza laifi n Shekwoyi gafara zhin yi. Ntuge zaknayi ye, Adamu ɓei ɓe aza mwa begye n fiyi ntu nwo laifi ɓo, Ama zaknayi ye, Yesu Kristi woi ɓe aza n mwa begye a gafara zhinyi dna n Shekwoyi sun-sun-gye. 16 Adamu laifi gmanyi ɓei ɓe aza nfi lada yin n mwa. Ama Kristi woi ku alaifi n mwa woi ga wye-wyeyi manayi nfi aba. 17 Zaknayi laifi Adamu, kwo la zhin esu tu n na aza tukwo vinya, ama oza n wa gwo Shekwoyi cauta, gafara zhin n lo-lo, ɓaku zhin wye-wyeyi asu ntu zaknanyi ɓo, Yesu Kristi. 18 E, Adamu laifi ɓei ɓe n tata yi n na aza tukwo vinya, ama Kristi ɓe manayi zhin kwa ze aza aɓe-fyece zhinyi n Shekwoyi abye, n na bai ɓa pwo. 19 Adamu wa zhin aza n mwa begye, ɓa ze alaifi da, ɓai zun Shekwoyi ɓeda gna, ama Kristi wa zhin Shekwoyi woi gwo aza n mwa begye ntuge wo ɓei vi ɓo.

20 Aɓei ga awyidna ngun awo, n nabai zahozahoi wa gye aba nwa kaya n Shekwoyi awyidna bwashi. Ama, sanu ya gye eyi alaifi, ya gye Shekwoyi alheri dna ngafara zhin mi n mwa. 21 Nsapai, laifi ɓei gyi ʼbe tu n aza tukwo vinya kwoi ɓe n ɓai nfi, ama nsayi ye Shekwoyi alheri nu gyi be, kwoi gayi a gni-gni manayi n Shekwoyi abye, n wye-wyeyi nyalo-nyalo nyayi n Yesu Kristi eyi Dagayi.